I plisòn

 


Nei tempi indré, tüti quei che ghèva un toche de giardén, la prima roba ch’i fèvun l’èra èl pulè.
E… cari i me fiöi… d’estade amò amò la ‘ndèva, cun un po’ de melga ciurdìda o spigulada se fèva no fadiga a mantegnì cin o ses galine…; ma, dopu la Vitoria, dal mès de utuber fin in primavera, mantegnì le galine l’èra no insì me dila!
A bas a la Costa, steva Ragnén chè l’èra no de Sant’Angel, i disèvun che èl ruèva da Maghèrnu: el gh’eva una scorba de fiöi e un bel pulè.
Ma le so galine e anca i so fiöi ièrun semper pièn de plisòn (plisòn = parassiti di animali da cortile)... E anca quèi che pasèva arènta al pulè o se fermèva a parlà cun un chividön, i tachèvun a gratà per i plisòn.
Ragnén èl sèva che per fa murì i plisòn ghe se vurèva un po’ de calcina bianca da müradü… insì un dì, stüfe da gratà, lü e i so fiöi, l’à caciade una sedela de calcina nel pulè e, viste che i plisòn ierun morti tüti, l’à pensade da caciàghe la calcina in testa al so fiöl, Bigén, che l’èra quel che ‘ndèva a tö i övi nel pulè.
El por Bigén, cun la calcina dala testa ai pé, èl pudeva pü respirà e quasi sufegade, l’àn purtade a l’uspedal. Su l’üs de l’uspedal gh’era Duardòn l’infermé, cun in buca mes tuscàn, per cumbate ogni malàn e ciapàde el por Bigén, l’à caciàde in un segiòn per laval dala calcina.
Ala fén, èl por Bigén èl se truade pièn de vesighe, al’uspedal per quindes dì.
Mario Bagnaschi



Duardòn (Edoardo Moroni) il popolarissimo infermiere del vecchio Ospedale Delmati